सार्वजनिक धार्मिक उत्सवांना 'वीजचोरीचे ' ग्रहण

 

            सार्वजनिक धार्मिक उत्सवांना 'वीजचोरीचे ' ग्रहण

  

        गणेशोस्तवाच्या उत्साहाने आसमंत बहरून गेला आहे . गेल्या काही वर्षांमध्ये सार्वजनिक उत्सव मोठ्या प्रमाणात साजरे केले जात आहेत आणि सकृत दर्शनी हि आशादायक व आनंदाची बाब आहे . धार्मिक उत्सवांचे मुख्य प्रयोजन हे सामाजिक प्रबोधन , नैतिक मूल्यांचे बीजारोपण , संस्कृतीचा व्यापक स्तरावर प्रचार -प्रसार , सामाजिक एकात्मतेच्या भावनेचे जतन आणि संवर्धन आणि सर्वात महत्वाचे म्हणजे सध्याच्या धकाधकीच्या आयुष्यात काही विरंगुळ्याचे क्षण ईत्यादी असते . वर्तमान सार्वजनिक उत्सव यापैकी किती उदिष्टपूर्ती करतात या प्रश्नांचे 'डोळस ' उत्तर दुर्दैवाने बहुतांश पातळीवर नकारात्मकच आहे .
view expressed on Zee24taas

          उलटपक्षी जसजशी उत्सवांच्या संख्येत आणि प्रमाणात वाढ होते आहे तसतशी त्यांचे तोटे अधिक प्रमाणात जाणवू लागले आहेत . ध्वनीप्रदूषण , वायुप्रदूषण , पाणीप्रदूषण हि सर्वज्ञात काही उदाहरणे आहेत . गेल्या काही वर्षात या उत्सवांच्या निमित्ताने एक नवीन डोकेदुखी समोर येत आहे आणि ती म्हणजे सर्रासपणे होणारी वीजचोरी .

   

  गतवर्षीच्या गणेशोस्तवाच्या वीज वापरा संबंधीची माहिती 'सार्वजनिक उत्सवातील वीजचोरी ' अधोरेखीत करणारी आहे . हलोजन बल्ब , हजारो बल्ब , सजावटीच्या माळा यांचा झगमगाट असूनदेखील वीजबिलात दर्शविलेले युनिट मात्र १०० /२०० च्या आसपास तर काही मंडळांच्या बाबतीत अगदीच ३०/५० युनिट आहे . सकृतदर्शनी वीजवापर पाहता हे कदापीही विश्वासार्ह नाही . अनेक मंडळानी वीज बिल देखील भरले नाही . हे झाले अधिकृत 'तात्पुरती वीज जोडणी ' घेणाऱ्या मंडळाच्या बाबतीत परंतु अशी अनेक मंडळे अस्तिवात आहेत की जे या पेक्षा अधिक सुलभ मार्ग स्वीकारतात आणि तो म्हणजे सरळसरळ बेस्ट /एमएसई बी किंवा पालिकांच्या स्ट्रीट लाईटच्या पोलवरून वीजजोडणी घेतात. हे सामान्य नागरिकांना दिसते परंतु वीज कंपन्यांच्या कर्मचारी अधिकाऱ्यांना मात्र का दिसत नाही ? हा संशोधनाचा विषय आहे . बहुतांश मंडळे हि राजकारण्याची असल्यामुळे त्यांची दबंगगिरी आणि मंडळ आणि वीजकर्मचारी यांची 'अर्थपूर्ण ' युती हि कारणे मात्र कुठल्याही संशोधनाविना उघडपणे दिसतात . 
link for news on illegal power connection in Ganesh  festival:
http://www.youtube.com/watch?v=D8lYiglvjv4

    लोकशाही व्यवस्थेत लोकप्रतिनिधी आणि राजकीय पक्षाचा कोणताही कार्यकर्ता यांना लोकशाहीतील कुठलेही नियम बंधनकारक नसतात असा जो अलिखित नियम उदयास येत आहे त्यामुळे सार्वजनिक कुठलेही उत्सव /कार्यक्रम सर्व कायदे -बंधनातून मुक्त असतात हा नवा 'आदर्श ' रुजला आहे . नुकताच साजरा झालेला दहीहंडी उत्सव याचे ज्वलंत उदाहरण आहे . मुख्य मुद्दा हा आहे की  वीजचोरीतून होणारा तोटा हा शेवटी सर्वसामान्य ग्राहकावरच टाकला जात असल्यामुळे त्या विरोधात आवाज उठविण्याचा त्याला अधिकार आहे . 

प्रतिबंधात्मक उपाय :

• ·         तात्पुरती वीज जोडण्या घेणाऱ्या मंडळाची यादी संकेतस्थळावर टाकावी .

• ·         जनतेला अशी वीजचोरी दिसल्यास त्याबाबतची माहिती टोलफ्री क्रमांकावर किंवा त्याचे फोटो मेल करण्याचे आवाहन करावे .

• ·         प्रसारमाध्यमांनी गणेशोस्तवाचे लाईव्ह प्रक्षेपण करण्यासोबतच वीजचोरी सारख्या गैरप्रकारावर प्रकाशझोत  टाकावा 

• ·         वीज कंपन्यांनी स्थानिक लाईनमन आणि कनिष्ट अभियंता यांच्यावर त्या त्या विभागातील मंडळाची वीज जोडणी तपासण्याची जबाबदारी टाकावी . 

• ·         पोलिस प्रशासनाने 'एनओसी ' दिलेल्या मंडळाची यादी वीज कंपन्यांना द्यावी किंवा संकेतस्थळावर टाकावी , जेणे करून अधिकृत वीज जोडणी घेणारे मंडळे उघड पडतील .

• ·          वीज कंपन्यांनी प्रत्येक उतस्वानंतर मंडळाचे नाव , वापरलेले युनिट , बिल भरले आहे किंवा नाही याची माहिती संकेत स्थळावर टाकावी .

• ·         वीज कंपन्याच्या वरिष्ठ अधिकाऱ्यांनी किमान १० मंडळांना अचानक भेटी देऊन वीज जोडणी आणि वापरात असणाऱ्या विजेच्या उपकरणांच्या प्रमाणात वीज वापराची मीटर मध्ये नोंद होते आहे का हे तपासावे