आष्टी तालुक्याचे नवनिर्वाचित आमदार श्रीमान बाळासाहेब आजबेंना खुले पत्र !

आष्टी तालुक्याचे नवनिर्वाचित आमदारांना " झुंजार नेता " (९ नोव्हेंबर २०१९ ) वृत्तपत्रातून लिहलेले खुले पत्र

     नवनिर्वाचित आमदार  श्रीमान बाळासाहेब आजबेंना खुले पत्र !

            श्रीमान बाळासाहेब आजबे साहेब सर्व प्रथम विधानसभा निवडणुकीतील विजयासाठी मनःपूर्वक हार्दिक  आपले अभिनंदन . निवडणूक लढवताना प्रत्येक राजकीय नेत्याच्या जशा आकांशा असतात तशाच काही अपेक्षा या मतदारांच्या देखील असतात . समस्त  मतदारांच्या अपेक्षा आपल्यासमोर मांडण्यासाठी हा पत्रप्रपंच . 

          कुठल्याही शहराचे  बसस्थानक हे त्या शहराचा आरसा असतो . या सूत्राने आष्टी -कडा  बसस्थानकाचा विचार करता आपण ज्या मतदार संघाचे प्रतिनिधित्व करणार आहात त्याच्या विकासाची -प्रगतीची दिशा व दशा स्पष्टपणे दिसून येते .  मराठवाड्याला मागास भाग का म्हटले जाते हे एका नजरेतून स्पष्ट करण्यासाठी हि बसस्थानके पुरीशी आहेत किंबहुना "शितावरून भाताची परीक्षा " या न्यायाने  अशा बसस्थानकामुळेच तर मराठवाड्याला मागास असे संबोधले जाते की काय अशी शंका उपस्थित केली तर ते अतिशोयुक्तीचे ठरणार नाही . 

              दिपावलीसाठी मी मुंबईहून सकाळी  ट्रॅव्हल्सने आष्टीला उतरलो . पत्नी व मुलीला बाथरूमला जायचे होते . अतिशय खेदाची गोष्ट  या संपूर्ण स्थानकात कुठेच टॉयलेटची सुविधा नसल्याचे दिसून आले .शेवटी पुढचा प्रवास तसाच करावा लागला . हीच व्यथा आष्टीला कॉलेजसाठी जाणाऱ्या  गावातील मित्राच्या  मुलींनी बोलून दाखवली . "आम्हाला तर बस मिळाली नाही तर कधी कधी २-२ तास नैसर्गिक क्रियांना आवर घालत घालमेल सहन करावी लागते " या तिच्या एका वाक्याने तालुक्याच्या  प्रगतीची लक्तरे डोळ्यासमोर येतात .

      महोदय , अर्थातच आपणास या गोष्टी ज्ञात नाहीत असे नक्कीच नाही . कदाचीत हे असेच चालणार हे गृहीत धरून तालुक्यातील मतदार व लोकप्रतिनिधी हे वाटचाल करत असल्यामुळे व  या गोष्टींकडे कानाडोळा करण्याची सवय जडली गेल्यामुळे 'नजर मेली ' असेल व त्यामुळेच या विषयी ना नागरीक आवाज उठवताना दिसतात ,ना लोकप्रतिनिधी जीवनावश्यक पायाभूत मूलभूत सुविधाकडे लक्ष पुरवताना दिसतात ,  ना या गोष्टींवर प्रकाश टाकण्याची गरज प्रसारमाध्यमांना दिसते आहे . होय ! असे नसते  तर मतदार संघाचा चेहरा -मोहरा आज जो केविलवाणा दिसतो आहे तो दिसला नसता . प्रश्न हा आहे की  यात बदल होणार का ? की  केवळ पदावरील व्यक्ती बदलणार आणि जनतेची ससेहोलपट मात्र चालूच राहणार ?

   असो ! नमनाला घडाभर तेल न जाळता प्रमुख मुद्याकडे वळू यात . पत्राचा प्रमुख मुद्दा आहे तो  ग्रामीण व शहरी भागातील आवश्यक पायभूत सुविधांचा अभाव व असलेल्या पायाभूत सुविधांचा निकृष्ट दर्जा . महाराष्ट्र शासन राज्यातील सर्वच भागांसाठी एखाद्या दुसऱ्या गोष्टींचा अपवाद वगळता समान निधी देत असते . या पार्श्वभूमीवर पश्चिम महाराष्ट्रातील खेडी व मराठवाड्यातील खेडी यांची तुलना 'डोळस पणे ' केल्यास मराठवाड्यातील व त्यात ही आष्टी तालुक्यातील खेडी व शहरे पूर्णपणे डावी ठरतात हे नाकारता येणार नाही . अर्थातच यास कुठलीही एक व्यक्ती वा कुठलाही विशिष्ट राजकीय पक्ष जबाबदार धरले जाऊ शकत नाही व तसे करणे गैर ठरते हे आम्ही नागरीक जाणतो .हे मात्र वास्तव आहे  की  यास आजवरचे सर्वपक्षीय  सर्वच लोकप्रतिनिधी जबाबदार आहेत .

मूलभूत पायाभूत सुविधांची वानवाच :  आष्टी तालुक्यातील बहुतांश खेडी आजही नळाद्वारे पिण्याचे शुद्ध पाणी , पक्के रस्ते , टॉयलेट्स , प्राथमिक आरोग्य केंद्राची सुविधा या सारख्या मानवास जगण्यासाठी आवश्यक मूलभूत पायाभूत सुविधांपासून वंचित आहेत . रात्रीचा अंधार तर खेड्यांच्या पाचवीलाच पुजलेला दिसतो कारण पोल आहेत पण त्यावर बल्बची वानवा असते . गावे हागणदारी मुक्त कागदावर झाली पण प्रत्यक्षात आजही रोडच्या कडेला , गावाच्या अवतीभोवती 'फुलांची 'माळ दिसते . केवळ फसवणूकच . ग्रामपंचायत ,पंचायत समिती , जिल्हा परिषद यांच्या माध्यमातून वर्षानुवर्षे करोडो रुपयांचा निधी खर्च करून सुद्धा पायभूत सुविधांची पूर्तता का होऊ शकत नाही हा जनतेला पडलेला यक्षप्रश्न आहे .

        एवढेच कशाला , हा प्रश्न केवळ खेड्यापुरता मर्यादीत नसून जो काही शहरी भाग म्हणून ओळखला  जातो त्यांची सुद्धा अवस्था  केवीलवाणीच आहे . तालुक्याचे ठिकाण आष्टी असू देत की कडा, दोन्ही ठिकाणी आजही पाणी  समस्या आहे . रस्ते नाहीत , मलनिःसारण वाहिन्या नाहीत , कचरा संकलन व्यवस्था नाही .  या पेक्षा दुर्दैव्य ते काय असू शकते .

दर्जाहीन सुविधा असून अडचण नसून खोळंबा :  बरे ! ज्या -ज्या सुविधा आजवर उपलब्ध झालेल्या आहेत त्यांचा दर्जा देखील प्रश्नांकीतच  आहे . नळ योजना आहेत पण त्या बंद अवस्थेत आहेत . सिमेंटचे रोड झाले पण त्यावर झाडू मारला की  सिमेंट निघून जाते आहे . सरकारी शाळा आहेत पण तिथे 'शिक्षणाची ' वानवा आहे आणि म्हणून खेड्यातील शेतकऱ्यांना , शेतमजुरांना , छोटे -छोटे उद्योग करणार्यांना आपल्या पोटाला चिमटे घेत ,झेपत नसताना आपल्या मुला -मुलींना शिक्षणासाठी गावाबाहेर पाठवावे लागत आहे . अगदी पहिलीपासुनच शिक्षणासाठी पाल्यांना  बाहेर पाठवावे लागत आहे .

        लाईटची तर वेगवेगळ्या कारणामुळे नेहमीच बोंब असते . कधी तार तुटली म्हणून लाईट नाही तर कधी डीपी जळाली म्हणून १५-१५ दिवस लाईटची बोंब असते .

निधीचा अपव्यय हा व्यवस्थेला जडलेला कँसर : ज्याच्या हाती सत्ता तो पारधी आणि कार्यकर्ते सांभाळण्यासाठी विविध योजनांचा वापर अशा प्रकारचा कारभार वर्षानुवर्षे 'चालू '   असल्यामुळे  बहुतांश खेड्यामध्ये अनेक योजना अर्धवट अवस्थेत पडलेल्या आहेत . लाखो रुपये खर्चून तलाठी निवास, शाळांचे अर्धवट वर्ग , ग्रामपंचायतीच्या दर्जाहीन इमारती , दर्जाहीन बाजारासाठी गाळे , समाजकेंद्र    , आरोग्यकेंद्र यासम  विविध लोकोपयोगी योजना राबवल्या   जातात पण त्या पूर्णत्वास  नेल्या जात नसल्यामुळे सरकारचे करोडो रुपये म्हणजेच आम्हा जनतेचेच करोडो रुपये पाण्यात जात आहेत . आजवर वेगवेगळ्या पक्षाची सरकारे आली , वेगवेगळ्या पक्षांचे आमदार झाले पण व्यवस्था परिवर्तन मात्र होताना दिसत नाही . करोडो रुपयांचा निधी खर्च होतो आहे पण निधीचा अपव्यय होत असल्यामुळे जनता मात्र आवश्यक सुविधांपासून वंचित राहताना दिसते आहे   .

पारदर्शकते अभावी जनता अंधारातच :   गेली काही वर्षे 'पारदर्शकता .. पारदर्शकता ... पारदर्शकता ' हा जयघोष ऐकू येत असला तरी प्रत्यक्षात आज नागरिकांना  विविध सरकारी योजनांच्या बाबतीत अंधारात ठेवले जात आहे . रेशनची योजना आहे पण येणारा माल कुठे जातो , कोणत्या नागरिकांना वितरित केला जातो हे कोणालाच कळू दिले जात नाही . गरीब जनतेच्या नावाने येणाऱ्या अनेक सरकारी योजनांचे लाभार्थी कोण -कोण आहेत हे ज्या गरिबांसाठी योजना राबवली जाते त्यांच्या पासूनच योजनांची माहिती गुप्त  'अर्थ ' काय आहे हे समजण्याच्या पलीकडे आहे . सगळेच लोकप्रतिनिधी आम्हाला जनतेची सेवा करावयाची आहे हे निवडणुकीपूर्वी सांगतात,   जनसेवेसाठीच आम्ही आहोत असे सांगतात पण प्रत्यक्षात मात्र 'जनसेवेच्या सर्व योजनांची माहिती ' पारदर्शकपणे जनतेसमोर ठेवत नाहीत . पारदर्शकतेअभावी जनता नेहमीच अंधारात ठेवण्याकडे व्यवस्थेचा कल दिसतो . यात परिवर्तन व्हावे हि जनभावना आपल्याकडे मांडण्यासाठी हा पत्रप्रपंच .

जनतेचा अपेक्षानामा :  

 जनतेने आपल्यावर काही अपेक्षेने विश्वास टाकलेला आहे . त्यातील काही प्रातिनिधिक अपेक्षा अशा :

·       

•   आष्टी बसस्थानकात त्वरीत  महिला व पुरुष स्वच्छ प्रसाधनगृहाची व्यवस्था .

• ·         ग्रामीण व शहरी भागात दर्जेदार रस्त्यांची निर्मिती .

• ·         बंद पडलेल्या नळयोजना तातडीने सुरु करणे .

• ·         सरकारी सर्व यॊजनांचा तपशील सर्व ग्रामपंचायतींना जनतेसमोर खुले करण्याची सक्ती .

·         गावातील नागरिकांचे जीवन सुलभ होण्यासाठी ग्रामसेवक , तलाठी , वायरमन , शिक्षक या सर्व सरकारी कर्मचाऱ्यांना नोकरीच्या ठिकाणी वास्तव्यास राहण्यास सक्तीचे करावे . वस्तुतः तसा सरकारी नियम आहे पण सरपंच मंडळी त्यांना राहता वास्तव्याचे प्रमाणपत्र देतात .

                                          सुधीर लक्ष्मीकांत दाणी . भ्र . ९८६९२२६२७२.

विशेष टीप  : महोदय , हे पत्र कुठल्याही रजकीय हेतूने प्रेरित नसून केवळ मतदारांच्या भावना समोर आणणे हा एकमेव व एकमात्र हेतू आहे या पत्राचा आहे.